Simptomat e ankthit - Ja 10 prej tyre

Simptomat e ankthit mund të shfaqen në shumë mënyra dhe për shumë arsye si:

Provime të rëndësishme;
Detyrimi për të mbajtur një fjalim para një publiku;
Një takim i parë me dikë;

Këto dhe të tjera mund të jenë të gjitha burime nervozizmi ose ndjenja të tjera që lidhen zakonisht me ankthin. Ky artikull do të diskutojë simptomat psiko-fizike të ankthit.

Simptomat e ankthit janë:

Shqetësim i tepërt
Vështirësitë e gjumit
Lodhja
Ulja e përqëndrimit
Nervozizëm dhe tension
Rritja e rrahjeve të zemrës
Djersitje dhe nxehtësi
Dridhje
Dhimbjet e gjoksit dhe mungesa e frymëmarrjes
Ndjenjat e terrorit

1. Shqetësim i tepërt

Sipas Institutit Kombëtar të Shëndetit Mendor, individët me çrregullime ankthi shpesh shqetësohen tepër ose kanë një ndjenjë frike dhe që zakonisht zgjat gjashtë muaj ose më shumë.

Një nga simptomat më të zakonshme të një çrregullimi ankthi është shqetësimi i tepruar. Shqetësimi që lidhet me çrregullimet e ankthit është joproporcional me ngjarjet që e shkaktojnë atë dhe zakonisht ndodh në përgjigje të situatave normale, të përditshme.

Këto ndjenja ankthi mund të burojnë nga:

Shkolla;
Vendi i punës;
Ndërveprimet shoqërore;
Marrëdhëniet personale;
Shëndeti ose financat
Shqetësime të tjera psiko emocionale, etj.

Për individët me ankth, mbajtja nën kontroll e këtyre ndjenjave mund të jetë e vështirë, edhe nëse e kuptojnë që shqetësimet ose frika e tyre janë joracionale.

2. Vështirësitë e gjumit

Është shumë e zakonshme që ankthi t’i mbajë njerëzit zgjuar natën, veçanërisht para një ngjarjeje që pritet të sjell frikë dhe tension.

Bërja e një gjumi të mirë mund të jetë e pamundur për disa individë, të cilët e gjejnë veten duke u hedhur dhe kthyer në shtrat për shkak të ankthit.

Gjumi është thelbësor për pothuajse çdo funksion në trup, përfshirë shëndetin tuaj mendor. Në fakt, problemet e gjumit gjithashtu mund të jenë një kontribues i ankthit dhe shpesh i përkeqësojnë gjërat.

Ka shumë mënyra që njerëzit të përmirësojnë zakonet e tyre të gjumit, por ata me ankth të rëndë dhe pagjumësi mund të përfitojnë nga konsultimi me një mjek apo psikolog. Rekomandimi i një terapie specifike për përmirësimin e gjumit është e domosdoshme.

3. Lodhja

Edhe nëse personi arrin të flejë – mund të ndihet i pakënaqur dhe nis të përjetojë lodhje gjatë gjithë ditës ose të lodhet lehtësisht. Ankthi mund të jetë rraskapitës emocionalisht dhe mund ta bëjë kalimin e ditës më të rëndë.

Kur jeni të lodhur, disponimi juaj gjithashtu mund të luhatet, duke çuar ndoshta në depresion, një gjendje që është shpesh e shoqërueshme me çrregullime ankthi.

Ankthi shkakton një ngritje hormonale që mund t’ju bëjë të ndiheni të lodhur dhe ndjenja e rraskapitjes zgjat. Edhe pasi të keni pushuar, mund të jeni duke përjetuar sërish lodhje. Ankthi, mungesa e energjise dhe lodhja kronike lidhen shumë së bashku.

4. Ulja e përqëndrimit

Vështirësia për t’u përqendruar është një simptomë e zakonshme e ankthit që mund të konsiderohet gjithashtu një efekt anësor i shqetësimit ose problemeve të gjumit.

Nëse luftojmë të mbajmë veten të përqëndruar për të përfunduar detyrat e punës ose të shkollës, mund të jetë “faji i ankthit”. Kur jemi në ankth, koka jonë është e mbushur me mendime dhe truri jonë është disi i njëanshëm duke u kushtuar më shumë vëmendje gjërave kryesisht negative.

Dhe nëse nuk po shqetësohen nga ankthi në këto momente, truri po gjen mënyra me ose pa vetëdije për të shpërqëndruar veten nga ato ndjesi të pakëndshme.

5. Nervozizëm dhe tension

Ankthi mund të bëjë që njerëzit të ndiejnë shpesh nervozizëm. Ndonjëherë, ata që janë të humbur në mendime për diçka shqetësuese mund të zemërohen lehtësisht dhe do të sulmojnë të tjerët kur stresohen.

Individët që jetojnë me ankth mund të zbulojnë gjithashtu se e humbin durimin e tyre shumë më shpejt se në të kaluarën.

Për fat të keq, kjo simptomë e zakonshme mund të jetë e dëmshme për jetën shoqërore dhe marrëdhëniet personale të një personi. Funksionimi i përditshëm bëhet i vështirë për njerzit kur nervozizmi bëhet kronik.

6. Rritja e rrahjeve të zemrës

Disa nga simptomat e ankthit më të përhapura në aspektin fizik përfshijnë zemrën.

Kur përballet me një situatë që nxit ankthin dhe stresin, një person mund të vërejë që rrahjet e zemrës së tij/saj rriten ose fillojnë të ndihen të parregullta.

Këto ndjenja janë shumë të zakonshme gjatë sulmeve të panikut dhe gjithashtu shpesh përjetohen nga ata me ankth social.

Ataket e panikut janë zakonisht afatshkurtra dhe mund të na prekin të gjithve por ata me një çrregullim paniku mund t’i përjetojnë ato shpesh.

7. Djersitje dhe nxehtësi

Djersitja është një përgjigjje normale trupore, ju e dini këtë. Por kjo nuk ndodh vetëm si një mënyrë që trupat tanë të qetësohen pas sforcimit.

Djersitja që vjen prej ankthit është mënyra e trupit tuaj për t’iu përgjigjur një rrahje të shpejtë të zemrës dhe një adrenaline të shkaktuar nga sistemi hormonal.

Aktiviteti i brendshëm trupor është i ngjashëm sikur të kemi vrapuar, ose të jemi duke u stërvitur, ndërkohë në një krizë ankthi, stresi apo paniku vjen pa bërë asnjërën prej tyre.

Djersitja ashtu si lotët, mundësojnë shkarkim dhe kthim të trupit në gjendje normale duke balancuar të rrahrat e zemrës dhe keq-frymëmarrjen.

8. Dridhje

Stresi që lidhet me ankthin mund të shkaktojë që gjymtyrët e një personi të dridhen në mënyrë të pakontrolluar, veçanërisht duart.

Ekzistojnë lloje të ndryshme dridhjesh, megjithatë, ato që shoqërohen me ankth shpesh shkaktohen nga adrenalina dhe reagimi i ikjes (një reagim që vjen në mënyrë automatike nga truri, kur ka një situatë që e përcepton të rrezikshme).

Trupi juaj përgatitet të merret me stresuesin, duke interpretuar shqetësimin si një sinjal që do t’ju duhet të qëndroni në këmbë ose të shpëtoni nga rreziku. Muskujt tuaj bëhen më të shpejtë për të vepruar, duke çuar në një ndjesi dridhjeje

Edhe pse kjo ndjenjë është e përkohshme, ajo është e pakëndshme dhe mund të krijojë më shumë frikë dhe ankth. Dridhjet e shkaktuara nga ankthi quhen dridhje psikogjene.

9. Dhimbjet e gjoksit dhe mungesa e frymëmarrjes

Ashtu si ndryshimet në zemër dhe temperaturë, frymëmarrja e një personi gjithashtu mund të ndikohet nga ankthi.

Ata mund të ndjehen sikur nuk mund të marrin oksigjen të mjaftueshëm në mushkëritë e tyre dhe përjetojnë një ndjesi shtrëngimi ose dhimbje në gjoksin e tyre. Dhimbje të tilla fizike mund të shkaktohen dhe nga tensioni muskulor që sjell një moment ankthi.

Ankthi bën që muskujt të tensionohen, gjë që mund të çojë në dhimbje dhe ngurtësi në pothuajse çdo zonë të trupit dhe pse përqëndrimi më i madh i dhimbjes ndodh në kraharor.

10. Ndjenjat e terrorit

Këto simptoma të veçanta mund të jenë mjaft të rënda dhe paralizuese. Ndjenja se diçka e keqe do të ndodhë ose është në proces të ndodhë, ndonjëherë mund të shfaqet nga askund.

Sipas Shoqatës Amerikane të Psikologjisë (APA), këto simptoma shpesh kalojnë brenda pak minutash. Në thelb ato nuk janë të rrezikshme dhe nganjëherë janë joproporcionale me ngjarjet aktuale që shkaktojnë ankth dhe panik.

Konkluzion

Njerëzit e përjetojnë ankthin ndryshe. Dhe ka lloje të ndryshme të çrregullimeve të ankthit:

Disa njerëz kanë çrregullim të përgjithësuar të ankthit.
Të tjerët mund të jetojnë me çrregullim paniku.
Disa njerëz mund të kenë vështirësi me fobitë specifike.

Pavarësisht se ka dallime midis llojeve, në këtë artikull keni të listuara disa nga simptomat e ankthit më të zakonshme.

Ankthi prek miliona njerëz në të gjithë botën, dhe megjithëse të gjithë kanë arsye të ndryshme për tu ndjerë të shqetësuar dhe të stresuar.

Kujdes, ju nuk duhet të përdorni këtë material për t’u vetë-diagnostikuar. Mënyra si duhet të përdorni këtë informacion është të kuptoni nëse keni prani të këtyre shenjave dhe nëse ju japin shqetësim të përditshëm, t’i drejtoheni një profesionisti të shëndetit mendor.

Pasi bëhet vlerësimi profesional i rastit tuaj unik, ndiqet dhe një plan trajtimi që i përshtatet nevojave tuaja. Shpresoj të keni marrë informacionin e nevojshëm për të marrë dhe hapat e duhur të trajtimit tuaj.