Postimet E Fundit
Problemet e adoleshencës – 10 Prej tyre
Problemet e adoleshencës janë shumë, por ne kemi përzgjedhur ato më kritiket që mund të prekin shëndetin e tyre mendor dhe fizik. Përparimet në teknologji nënkuptojnë se adoleshentët e sotëm po përballen me çështje që asnjë brez i mëparshëm nuk i ka parë ndonjëherë.
Ndërsa disa probleme nuk janë të reja, media elektronike ka ndryshuar ose përforcuar disa nga vështirësitë me të cilat ballafaqohen të rinjtë.
Më poshtë janë 10 problemet e adoleshencës me të cilat luftojnë çdo ditë:
- Depresioni
- Ngacmimi
- Aktiviteti seksual
- Përdorimi i drogës
- Përdorimi i alkoolit
- Obeziteti
- Problemet akademike
- Presioni i bashkëmoshatarëve
- Media sociale
- Ekspozimi ndaj dhunës
1. Depresioni
Disa studiues fajësojnë teknologjinë për rritjen e problemeve të shëndetit mendor tek adoleshentët.
Të kalosh shumë kohë në pajisjet elektronike, mund të pengojë të rinjtë nga aktivitetet personale, apo sociale me bashkëmoshatarët e tyre, siç janë sportet, të cilat luftojnë depresionin.
Çrregullimet depresive janë të trajtueshme, por është e rëndësishme të kërkoni ndihmë profesionale.
Nëse shikoni që adoleshenti juaj duket i tërhequr, përjeton një ndryshim në zakonet e tij të gjumit ose fillon të performojë keq në shkollë, caktoni një takim me mjekun ose kontaktoni një profesionist të shëndetit mendor.
Mos e vononi marrjen e ndihmës për adoleshentin tuaj nëse vëreni këto simptoma.
2. Ngacmimi
Rritja e përdorimit të mediave sociale nga adoleshentët, ka bërë ngacmimin shumë më publik dhe më të përhapur.
Në fakt, ngacmimi kibernetik ka zëvendësuar ngacmimin si lloji i zakonshëm i ngacmimit që përjetojnë adoleshentët.
Flisni rregullisht me adoleshentin për ngacmimet dhe bullizmin.
Diskutoni se çfarë mund të bëjnë kur janë dëshmitarë të ngacmimeve dhe flisni për opsionet nëse bëhen objektiv vetë. Të qenit aktiv është çelësi për të ndihmuar fëmijën tuaj të përballet me një ngacmues.
Është gjithashtu e rëndësishme të flisni me fëmijën tuaj se kur dhe si të merrni ndihmë nga një i rritur. Kujtojuni atyre se kërkimi i ndihmës nuk është një shenjë dobësie, por përkundrazi një shfaqje guximi.
3. Aktiviteti seksual
Prindërit mund të mos jenë të vetëdijshëm nëse fëmijët e tyre janë aktivë seksualisht. Bisedoni me adoleshentin për seksin, edhe nëse nuk mendoni se po merret me aktivitet seksual.
Sidoqoftë, studimet tregojnë se në dekadën e fundit, ka rënë numri i lindjeve në adoleshencë dhe i sëmundjeve të transmetueshme.
4. Përdorimi i drogës
Fatkeqësisht, adoleshentët shpesh nënvlerësojnë se sa e lehtë është të krijosh një varësi.
Dhe ata nuk i kuptojnë rreziqet që lidhen me mbidozën. Sigurohuni që po flisni për këto rreziqe në mënyrë të qëndrueshme. Sigurohuni që keni biseda të rregullta me adoleshentin në lidhje me rreziqet e drogës.
5. Përdorimi i alkoolit
Një nga problemet e adoleshencës është dhe alkoli. Alkoli mund të ndikojë seriozisht zhvillimin e trurit të një adoleshenti.
Edukimi i tyre për rreziqet është hapi i parë për të shmangur rreziqet e pirjes.
6. Obeziteti
Përveç faktit se fëmijët mbipeshë shpesh shënjestrohen nga ngacmuesit, ata gjithashtu janë në një rrezik shumë më të madh të problemeve shëndetësore gjatë gjithë jetës, të tilla si:
- Diabeti;
- Artriti;
- Kanceri;
- Sëmundjet e zemrës.
Ata gjithashtu mund të luftojnë me çështjet e imazhit të trupit ose të zhvillojnë çrregullime të ngrënies, si një mënyrë jo e shëndetshme për të ndryshuar pamjen e tyre.
Por prindërit nuk janë gjithmonë të vetëdijshëm për këto çështje.
7. Problemet akademike
Rreth 5% e nxënësve të shkollave të mesme braktisin shkollën çdo vit. Nga braktisja e shkollës së mesme, i riu ka të ngjarë të fitojë më pak gjatë jetës së tij, kur krahasohet me një të diplomuar, gjë që mund të ketë një ndikim të rëndësishëm në të ardhmen e një të riu.
Por, nuk janë më vetëm “adoleshentët me probleme” që braktisin shkollën. Disa adoleshentë ndiejnë aq shumë presion për të hyrë në një universitet të mirë, sa digjen para se të mbarojnë shkollën e mesme.
8. Presioni i bashkëmoshatarëve
Ndërsa presioni i bashkëmoshatarëve nuk është një çështje e re, mediat sociale e sjellin atë në një nivel krejt të ri.
Sexting, për shembull, është një shkak kryesor për t’u shqetësuar. Shumë adoleshentë, nuk i kuptojnë pasojat e përjetshme që shpërndarja e fotografive eksplicite mund të ketë në jetën e tyre.
Por ndarja e fotove të papërshtatshme nuk është e vetmja gjë që u bëhet presion fëmijëve.
Gjithnjë e më shumë fëmijë janë nën presion për të bërë seks, për të marrë drogë, madje edhe për të ngacmuar fëmijët e tjerë. Ndonjëherë, fëmijët mund të bëjnë zgjedhje gabim dhe mund të kenë shumë frikë të kërkojnë ndihmë.
Sigurohuni që fëmijët tuaj të mos kenë frikë të vijnë tek ju kur bëjnë një gabim.
Tregojuni se mund të dëgjoni pa gjykuar ose reaguar keq dhe në vend të kësaj gjeni mënyra të shëndetshme që ata të përmirësohen dhe të ecin përpara.
9. Media sociale
Facebook, Instagram dhe Twitter mund të jenë mënyra të shkëlqyera për adoleshentët që të lidhen me njëri -tjetrin.
Gjithashtu mediat sociale mund të jenë problematike për disa arsye:
- Ekspozojnë adoleshentin tuaj ndaj ngacmimeve kibernetike;
- Ndryshon mënyrën se si adoleshentët miqësohen;
- Ndikon në shëndetin e tyre mendor;
- Ka të ngjarë të ekspozohen ndaj njerëzve të pakëndshëm, imazheve jo të shëndetshme dhe përmbajtjeve seksuale në internet.
Ndërsa po merren masa për të zvogëluar rreziqet që fëmijët përballen në internet, është e rëndësishme që prindërit të përfshihen.
10. Ekspozimi ndaj dhunës
Adoleshentët janë dëshmitarë të disa mediave të dhunshme.
Dhe nuk janë vetëm TV, muzika dhe filmat që përshkruajnë dhunën. Shumë nga video lojërat, portretizojnë skena të tmerrshme dhe akte agresive shqetësuese.
Gjatë dy dekadave të fundit, studimet e kanë lidhur shikimin e dhunës me mungesën e ndjeshmërisë dhe madje edhe sjelljen agresive.
Konkluzion
Prevalenca e komunikimit dixhital ka ndryshuar mënyrën se si adoleshentët ndërveprojnë në shoqëri. Për shkak të kësaj, shumë adoleshentëve u mungojnë aftësitë thelbësore të komunikimit ndërpersonal.
Problemet me të cilat përballen adoleshentët prekin shëndetin fizik dhe psiko emocional.
Nga përdorimi i lëndëve narkotike, alkolike deri tek format e ngacmimeve kibernetike, janë vetëm disa nga problemet e adoleshencës.
Prinderit mund të ndihmojnë jashtzakonisht, ose mund të thellojnë problemin nëse e neglizhojnë atë. Ekzistojnë forma suporti si psiko edukim për prindërit që u lehtëson prindërimin me adoleshentët e vështirë.
