Terapi individuale apo terapi grupi — Cilën të zgjedh?

“A duhet të zgjedh terapi individuale apo terapi grupi?”

Pyetja duket praktike, por nën të fshihet diçka më e thellë: 
si dua ta ndjej procesin e shërimit tim, vetëm me dikë që më dëgjon, apo i rrethuar nga njerëz që e kuptojnë atë që po kaloj sepse edhe ata po e kalojnë të njëjtën?

Nuk ka përgjigje universale. Ka vetëm pyetje më të mira që mund t’i bëni vetes dhe kuptim më të thellë të asaj çfarë secila formë ofron në realitet.

Vendimi mes terapisë individuale apo terapisë në grup mbetet personal, por mund ta bëni shumë më të qartë kur e kuptoni si funksionon secila.

1. Cili është ndryshimi kryesor?
2. Arsyet pse grupi funksionon?
3. Kur terapia individuale mbetet e pazëvendësueshme?
4. Kombinimi: terapi individuale me terapi grupi
5. Si ta vendos: terapi individuale apo terapi grupi?

1. Cili është ndryshimi kryesor?

Terapia individuale

Terapia individuale funksionon si lidhje private mes jush dhe psikologut. Çdo minutë u takon juve. Psikologu ndjek ritmin tuaj, kthehet prapa kur ju keni nevojë të ktheheni prapa, dhe nuk ka presion për t’u përshtatur me axhendën e askujt tjetër. 

Kjo krijon një lloj thellësie që është e vështirë të arrihet ndryshe: 
mund të zbërtheni një kujtim specifik 
një marrëdhënie të caktuar
një model sjelljeje që ju përsëritet 
..pa u shqetësuar se dikush tjetër ka nevoja të ndryshme.

Terapi grupi

Terapia në grup, funksionon ndryshe dhe jo thjesht sepse ka më shumë njerëz të lidhur në të njëjtën thirrje. Ajo funksionon sepse vetë prania e të tjerëve bëhet pjesë e procesit terapeutik.

Psikologu Irvin Yalom, një nga emrat më të rëndësishëm në studimin e terapisë së grupit, e përshkroi këtë me një ide të thjeshtë por të fuqishme:

Shumica e vuajtjes sonë psikologjike lind dhe ushqehet brenda marrëdhënieve me të tjerët pra, edhe shërimi ka kuptim më të plotë kur ndodh brenda një marrëdhënieje, jo në izolim.

Kjo do të thotë që në grupi, ju nuk po dëgjoni thjesht këshilla nga një psikolog.

• Përjetoni në kohë reale se si reagoni kur dikush ju kundërshton.
• Si ndiheni kur dikush ju kupton pa e shpjeguar gjatë.
• Si ndryshon perceptimi juaj për problemin kur e shihni atë të pasqyruar te dikush tjetër.

2. Arsyet pse grupi funksionon?

Ka një frikë të zakonshme që na vjen shpesh kur dikush konsideron terapi individuale apo terapi në grup: “Nuk dua të flas për problemet e mia para njerëzve që nuk i njoh.”

Kjo frikë është e kuptueshme por bazohet në një supozim të gabuar për si funksionon vërtet një grup terapeutik i mirëstrukturuar.

Në praktikë, ajo që ndodh më shpesh nuk është ekspozimi, por zbulimi i universalitetit një nga mekanizmat më të fuqishëm terapeutikë që ekziston.

Imagjinoni dikë që hyn në grupin online të ankthit i bindur se "askush nuk e kupton sa e rëndë është kjo që po ndjej." 

Në seancën e dytë apo të tretë, dëgjon dikë tjetër nga ekrani tjetër duke përshkruar saktësisht të njëjtën ndjenjë, të njëjtën frikë të pashpjegueshme para diçkaje që "duhet" të jetë e thjeshtë. 

Ai moment, i thjeshtë në dukje, e ndryshon tërësisht mënyrën si personi e mban këtë peshë. Nuk e mban më vetëm dhe pesha e vetmisë, shpesh, është aq e rëndë sa vetë problemi origjinal.

Ka edhe një dimension tjetër, më pak të folur: grupi bëhet një lloj “laborator marrëdhëniesh”.

Nëse dikush ka vështirësi të thotë “jo,” të shprehë zemërim pa u ndier fajtor, ose të pranojë përkujdesje pa u ndier i dobët këto modele shfaqen natyrshëm brenda dinamikës së grupit, jo vetëm kur flitet për to në teori.

Dhe kur shfaqen aty, në kohë reale, mund të punohen aty, me mbështetjen e psikologut dhe reagimin e vërtetë të njerëzve të tjerë.

3. Kur terapia individuale mbetet e pazëvendësueshme?

Do të ishte e pandershme të thuhej se grupi është “më i mirë” kur krahasojmë terapi individuale apo terapi në grup.

Ka çështje që kërkojnë hapësirën private të terapisë individuale për arsye shumë konkrete.

• Nëse jeni në mes të përpunimit të një traume specifike që kërkon kohë dhe ritëm shumë individual
• Nëse keni nevojë të flisni për detaje që nuk jeni gati t’i ndani me asnjë tjetër përveç një personi
• Ose thjesht funksiononi më mirë kur e gjithë vëmendja dhe koha u takon juve pa u ndarë

… terapia individuale ofron diçka që grupi thjesht nuk mund ta zëvendësojë: përqendrim të plotë, në ritmin tuaj, pa marrë parasysh axhendën apo ritmin e askujt tjetër.

Ekziston edhe një aspekt praktik: disa çështje kanë nevojë për punë të thelluar përpara se personi të jetë gati të hapet në një hapësirë grupore.

Terapia individuale mund të jetë hapi që përgatit terrenin, që ju e ndërtoni gjuhën, kuptimin dhe qëndrueshmërinë emocionale të nevojshme, para se ta sillni atë punë në një grup me të tjerë.

4. Kombinimi: terapi individuale me terapi grupi

Kombinimi i të dyjave është shpesh qasja që jep rezultatet më të qëndrueshme.

Dikush mund të vazhdojë terapinë individuale për të punuar me shtresat më të thella, personale të një çështjeje. 

Ndërkohë që merr pjesë në një grup për të praktikuar në kohë reale atë që po mëson. Për të përjetuar mbështetjen e vazhdueshme që një seancë e vetme, sado e mirë, nuk mund ta ofrojë çdo javë.

Në fakt, shumë psikologë e rekomandojnë këtë kombinim pikërisht sepse dy format-et adresojnë nevoja të ndryshme që nuk konkurrojnë me njëra-tjetrën: 

Thellësia individuale nga njëra anë, dhe ndjenja e përkatësisë dhe praktika e vazhdueshme nga ana tjetër.

5. Si ta vendos: terapi individuale apo terapi grupi?

Në vend që të pyesni “cila është më e mirë,” pyetjet që vlen t’i bëni vetes kur konsideroni terapi individuale apo terapi grupi janë më specifike:

A ndihem i/e izoluar në atë që po kaloj, apo ndihem thjesht i/e mbingarkuar dhe kam nevojë për hapësirë private?

Izolimi shpesh trajtohet mirë nga grupi; mbingarkesa shpesh ka nevojë për hapësirën individuale fillimisht.

A jam gati të dëgjoj perspektiva të njerëzve të tjerë, apo ndihem se kam nevojë të flas pa ndërprerje deri sa të gjej fjalët e mia?

E para përshtatet me grupin; e dyta shpesh ka nevojë të fillojë individualisht.

A ka diçka që kam frikë ta them me zë të lartë përpara kujtdo, apo frika ime është më shumë për të qenë “vetëm” në procesin tim?

Frika e parë shpesh zgjidhet gradualisht.. duke filluar individualisht dhe duke lëvizur drejt grupit kur jeni gati.

Frika e dytë shpesh është pikërisht ajo që grupi adreson më mirë.

Asnjë prej këtyre pyetjeve nuk ka një përgjigje “të saktë” por të menduarit rreth tyre e bën zgjedhjen shumë më të qartë se sa thjesht të pyesësh “cila është më e mirë.”

Fjala e fundit

Terapia, në çfarëdo forme që vjen, individuale apo në grup, të dyja, nuk është një formulë e ngurtë.

Është një proces që përshtatet me ju. 

Dhe shpesh, mënyra më e mirë për ta zbuluar cila formë ju përshtatet, është të flisni me dikë që mund të dëgjojë situatën tuaj specifike dhe t'ju ndihmojë të shihni qartë atë që nga brenda është më e vështirë ta shihni.

Nëse nuk jeni të sigurt cila formë ju përshtatet, kontaktoni Psikologu Online për një bisedë fillestare që ju ndihmon të kuptoni cila rrugë ka më shumë kuptim për situatën tuaj.