Ankthi obsesiv – Si të ndaloj mendimet ankthioze

Ankthi obsesiv mund t’ju bëjë të ndiheni sikur jeni të pafuqishëm për të ndaluar të menduarin shqetësues apo disa sjellje të caktuara. Dini se nuk jeni vetëm në këtë.

Pra si të ndaloni mendimet obsesive:

1. Hiq dorë nga përpjekja për t’i ndaluar
2. Prano mendimet e tua
3. Shkruani mendimet e vazhdueshme
4. Mësohuni me ankthin
5. Zgjidhje të përgjithshme për ankthin obsesiv

1. Hiq dorë nga përpjekja për t’i ndaluar

Studime të shumta shkencore kanë treguar se përpjekja për të “mos” menduar për diçka në fakt mund t’ju bëjë të mendoni më shumë për të. Kjo sepse kur përqendroheni në shmangien e një mendimi, ju po i kujtoni trurit se mendimi ekziston, në vend që thjesht ta injoroni. 

Është një mënyrë e çuditshme se si funksionon truri, duke e bërë shumë të vështirë për dikë që dëshiron t’i japë fund mendimeve nga ankthi obsesiv.

Kjo mund të jetë veçanërisht e vështirë për ata që luftojnë me mendime obsesive nga OCD. Nëse përjetojnë shumë turp ose frikë për këto mendime, ata do të përpiqen të mos i kenë ato. Por kjo do të bëjë që ata të kenë edhe më shumë mendime, duke i lënë të bllokuar në një rreth vicioz.

2. Prano mendimet e tua

Para së gjithash, ju duhet të ndaloni së turpëruari veten dhe të ndaloni të ndjeheni sikur duhet t’i largoni me patjetër këto mendime.

Pranimi është vendimtar. Këto mendime nuk janë në kontrollin tuaj dhe nuk janë diçka që duhet të prisni të kontrolloni. 

Është si të sëmuresh nga ftohja. Ju nuk zemëroheni me veten për teshtitjen, kështu që nuk duhet të përpiqeni t’i luftoni mendimet tuaja ose t’i shihni ato si një pjesë të keqe të personalitetit tuaj. 

Kjo është padyshim shumë e vështirë për disa njerëz dhe ndonjëherë nevojitet mbështetje nga një psikolog.

3. Shkruani mendimet e vazhdueshme

Ndonjëherë ju do të keni një mendim që është obsesiv dhe këmbëngulës. Provoni t’i shkruani ato mendime në një lloj ditari. Mendja juaj mund të përqendrohet më pak në këto mendime shqetësuese kur keni mundësinë t’i përpunoni ato ndryshe duke i shkruar.

Shkrimi ndihmon në lehtësimin e stresit duke luftuar mendimet negative dhe ndërhyrëse. Studimet shpjegojnë se shkrimi për përvojat negative mund t’ju ndihmojë t’i kapërceni ato.

4. Mësohuni me ankthin

Një nga pjesët më të vështira për ata që jetojnë me mendime nga ankthi obsesiv është ideja se ata duhet të jetojnë me ankthin. Por të mësosh të jesh mirë me ankthin është në fakt një strategji efektive.

Një pjesë e kësaj do të vijë nga pranimi, siç u përmend më lart. Por një pjesë tjetër e madhe është thjesht të mësosh se të shqetësohesh është plotësisht në rregull.

Sjelljet detyruese në të vërtetë forcojnë ankthin obsesiv, sepse ju po i privoni vetes mundësinë për t’i mbijetuar ankthit dhe t’i provoni vetes se kjo është e mundur. Të lejoni veten të jeni në ankth për një kohë, do t’ju bëjë të zbuloni se mendimet shkaktojnë më pak frikë, sepse ju kuptoni që asgjë nuk do të vijë prej tyre.

Kjo shpesh duhet të kryhet në prani të një psikologu që mund t’ju mësojë truket dhe ushtrimet e nevojshme për të ndaluar përpjekjet për të zgjidhur mendimet tuaja ankthioze. 

5. Zgjidhje të përgjithshme për ankthin obsesiv

Ankthi është i menaxhueshëm por është e rëndësishme të gjesh trajtimin dhe të ndryshohet stili i jetës:.

Disa nga opsionet më të mira për mendimet obsesive përfshijnë:

• Terapia konjitive e sjelljes: Kjo është një nga terapitë më efektive për mendimet obsesive pasi synon në mënyrë specifike të menduarit problematik dhe ofron strategji vepruese për ta eliminuar atë.
• Ndryshimet e stilit të jetesës: Gjumi, stërvitja dhe reduktimi i stresorëve të përditshëm mund të ndihmojnë në menaxhimin e ankthit.
• Medikamentet: Edhe pse nuk preferohen, ka medikamente efektive që ndihmojnë ta kalohet faza intensive shqetësuese. Kështu ju punoni lehtësisht me ndryshimin e mendimeve ankthioze në terapi. Shpesh, mjekimi përdoret si plotësues i psikoterapisë. Kujdes, vetëm mjeku psikiatër mund të japë medikamente.

Përmbledhje

Ankthi obsesiv sjell një të menduar të vazhdueshëm dhe shqetësues tek njeriu. Këto medime janë të vështira për t’u hequr dhe janë të zakonshme në shumë çrregullime ankthi. 

Një nga arsyet që OCD dhe çrregullimet e tjera të ankthit keqkuptohen kaq shumë është sepse shumë njerëz pretendojnë se kanë OCD ose mendime obsesive kur në të vërtetë nuk kanë. 

Do të dëgjoni shumë të famshëm, për shembull, që thonë se kanë OCD sepse u pëlqen ushqimi i tyre të prezantohet në një mënyrë të caktuar, ose nuk u pëlqen të bëhen pis. Miliona njerëz i kanë këto probleme, por nuk kanë ndonjë çrregullim psikologjik. 

Strategjitë për të reduktuar mendimet përfshijnë të mësuarit për të mos pasur frikë prej tyre, pranimin e ankthit dhe integrimin e trajtimeve më gjithëpërfshirëse të ankthit.

Mos u përpiqni vetëm të hiqni mendimet obsesive. Nëse gjen vështirësi në menaxhimin dhe trajtimin e ankthit përmes vetë-ndihmës, drejtohu një psikologu.