Arela Çarku

Mbështetja psikologjike ofrohet duke iu përshtatur nevojave, kushteve dhe mundësive të individit. E rëndësishme është të ndjerit mjaftueshëm të sigurt për të ndarë shqetësimin, nevojën dhe për të kërkuar ndihmë. Nga eksperienca si psikologe klinike në organizata që punojnë me viktimat e trafikimit, fëmijët në situatë rruge dhe me traumat kolektive, kam zhvilluar aftësi shumë të mira për ofrimin e këshillimit psikologjik në rastet e traumave me natyrë seksuale, dhune dhe neglizhimi emocional. Ekspertizë në trajtimin e traumave të fëmijërisë dhe në trajtimin e ankthit, depresionit dhe traumave të shkaktuara nga të pasurit orientim seksual LGBT+.

Qasja që aplikoj në psikoterapi është psikoanaliza. Një qasje e orientuar në nevojat e shtypura, të paplotësuara që në fëmijëri, në mekanizmat mbrojtës që përdorim në përditshmëri, në analizën e ëndërrave dhe fantazive që mund të provokojnë shqetësime të ndryshme dhe në kuptimin e sjelljeve, marrëdhënieve që janë jo funksionale për një periudhë të caktuar dhe që të bëjnë të vuash për një kohë relativisht të gjatë.

Nuk është e lehtë të kërkosh ndihmë! Por nëse je duke e lexuar këtë profil dhe je duke menduar a është momenti i duhur për ta marrë këtë hap, më beso që tashme sapo e bëre hapin e parë.

Le ta nisim këtë rrugëtim…